पिंजडा ब्याक एगेन’मा निखिलले सारासँग यसरी हल्लाए कम्मर

Posted By Badal Nepal || Date: 12 October, 2017

बिहिबार आयोजना भएको चलचित्र ‘पिजडा ब्याक एगेन’को पत्रकार सम्मेलनमा करिब एक घन्टा ढिलो पुगेका नायक निखिल उप्रेतीले निकै रमाइलो कुरा गरे । नेपाली चलचित्रमा लामो समयदेखि सक्रिय रहँदा पनि निखिलले नृत्यमा कहिल्यै सुधार ल्याएनन् । झन्, यसपटक त उनलाई कोरियोग्राफर रामजी लामिछानेले एक लोक लयको गीतमा कम्मर हल्लाउन लगाएका छन् ।

पत्रकार सम्मेलनमा निखिलले भने–‘मैले बल्ल बल्ल कम्मर हल्लाएको छु । तपाइहरुले कम्मर हल्लाएको ठाउँमा ताली बजाइदिनु होला ।’ साच्चै, गीतको भिडियोमा निखिलको नृत्य निकै नै कमजोर छ ।

हिमाल केसीको निर्देशनमा तयार भएको यो चलचित्रको ‘यता पनि छैन उता पनि छैन’ बोलको गीतमा निखिलको कमजोर नृत्यको अगाडि नायिका साराको नृत्य बेजोड छ । साराको अगाडि निखिल निकै कमजोर देखिएका छन् भने रामजी लामिछानेको कोरियोग्राफी पनि कमजोर छ ।

यसपटक पनि संगीतकार राजनराज सिवाकोटीले नेपाली परिवेशलाई समातेर गीत तयार पारेका छन् । यो गीतमा उनकै शब्द छ । अन्जु पन्त र राजनराज सिवाकोटीको यो गीतमा आवाज छ ।  माघ ५ गतेबाट रिलिज हुने चलचित्रको एक्सनमा पनि विशेष ध्यान दिइएको निर्देशक केसीले जानकारी दिए । केसीले पारिवारिक कथावस्तुमा चलचित्र बनाएको बताए ।

नायिका साराले कार्यक्रममा बोल्दै चलचित्रमा काम गर्न आफूलाई निखिल उप्रेतीदेखि निर्देशक हिमाल केसीले साथ दिएको बताइन् । रोहित पुरी, गोविन्द गैरे, चन्द्र बहादुर क्षेत्रीले चलचित्रमा लगानी गरेका छन् ।